Þekktur í Vínbúðunum

Eftir að nýtt, mjög flott Ríki var sett á laggirnar í Skútuvoginum (sorrí Hildur Petersen þetta heitir bara Ríkið) þá hef ég beint mínum viðskiptum mjög ákveðið þangað. Kemur kannski ekki á óvart því þetta er ekki nema steinsnar frá vinnunni minni. Allar sérpantanir sem ég geri (og þær eru nokkrar) fara núna þarna í gegn.
Fyrir nokkrum dögum, þegar jólabjórinn kom inn í búðirnar þá kíkti ég aðeins inn á heimleið úr vinnunni. Þar sem ég stóð og var að skoða úrvalið þá kom einn starfsmaður búðarinnar að mér og sagði: Jón Lárus, sérpöntunin þín er komin. Ég veit ekki alveg hvort þetta er vont eða slæmt…

Penslasápa

Lenti í því núna fyrir nokkrum dögum þegar ég var að mála niðri í þvottahúsi að ég gleymdi að skola úr penslum og rúllu, sem ég hafði verið að nota. Áttaði mig ekki á því fyrr en daginn eftir og þá voru bæði penslar og rúlla náttúrlega orðin grjóthörð. Ég mundi þá eftir því að ég hafði lesið grein einhvern tímann í haust um að það væri til penslasápa sem væri hægt að leggja hörð málningaráhöld í og þau yrðu eins og ný. Ég ákvað að reyna þetta. Keypti brúsa af sápu og skellti penslum og rúllu í meðferð. Það kemur síðan í ljós að þetta efni kengvirkar. Penslarnir búnir að liggja í sápunni í tvo daga og orðnir mjúkir og fínir aftur. Spillir svo ekki fyrir að þetta er íslensk framleiðsla.

Hringekjan

Enn einu sinni er búið að taka einhver af eftirtöldum fyrirtækjum: SKÝRR, Kögun, Eskil, Landsteina-Streng og Teymi, setja í poka. Hrista svolítið. Hella úr pokanum og sjá hvað kemur út. Liggur við að eina fyrirtækið í bransanum, sem fái ekki að vera með sé Tölvuþjónusta Akraness (ok, ok HugurAx og TM software ekki heldur). Svona í lok kapalsins þá er Þórólfur Árnason alltaf látinn fjúka.

Loppa

er komin með nýjan uppáhaldsstað. Hana er oftast nú að finna í litlum stól, sem Finnur á.

Hún kann svo alveg þetta með að láta fara vel um sig…

Gráðostur

Mér fannst ég vera þannig myglaður áðan, áður en ég skellti mér í sturtu…

Ég er ekki

með James Bond komplex. Það þurfti samt að stafa það ofan í eftir að hafa mætt á barinn á Samskipaárshátíðinni áðan í smóking og beðið um dry martini, kokteilinn…

Jei II

Fífa massaði bílprófið. Höfum ekki mátt segja neitt fram að þessu. En semsagt nú er það opinbert. Bros!

Harðsperrur dauðans

Er með svoleiðis núna eftir fyrsta innanhússboltann á þriðjudaginn. Erfitt að lyfta fótunum, vont að ganga. Ekki nóg með það, heldur er ég líka með harðsperrur í efri hluta líkamans. Svo á að heita að maður sé í sæmilegu formi. Virðist ekki vera samkvæmt þessu.

Spa

kappaksturinn á morgun gæti orðið sá mest spennandi í langan tíma. Fyrstu fjórir keppendurnir á ráslínu hafa ýmist ekki unnið kappakstur, ekki unnið kappakstur fyrir núverandi lið eða unnu fyrsta kappakstur fyrir núverandi lið í síðustu keppni. Allir þekktustu ökumennirnir eru svo dreifðir þar fyrir aftan. Uppskrift að spennandi keppni. Ég verð a.m.k. límdur við skjáinn. Svo bara spurning hvort að rigni?

Varðandi HHG

og mætingu á mótmæli. Þá er ég ekki stuðningsmaður ofbeldis og árása. Hins vegar verður maður að hafa í huga andrúmsloftið í þjóðfélaginu.
Bara til að taka dæmi þá gengur bleiknefji ekki í gegnum Bronx hverfið í NY án þess að vera í felulitum. Þetta ætti HHG, ef hann væri ekki skyni skroppinn, að vera sér vitandi um.

Póstsjokk

Mér finnst nú ábyrgðarhluti hjá póstinum að bera út bæði LÍN greiðsluseðlana og Vísa reikningana á sama deginum. Maður kemur heim og fær alveg áfall yfir „óvæntum“ reikningum.

Hótunarbréf

Í fríinu okkar fyrir vestan á ættaróðalinu þá fann Fífa alveg magnað bréf þegar hún var að róta í einhverjum kössum niðri í kjallara.

Bréfið leit svona út:

Innihaldið í bréfinu er eftirfarandi:

Þú ert vondur maður Jón að setja mirkur yfir okkur þegar við sitjum hér í sakleysi. Þú skalt fá að kenna á því að þetta er skrifað í mirkrinu. Eilíf hefnd skal yfir þig koma fyrir þetta athæfi. Ef þú ferð nú ekki að koma með ljósið verður þú settur á gálgann á morgun. Ég hefði nú gjarnan viljað skrifa þér betra bréf en þú átt það ekki skilið.

Þinn Selur

Til útskýringar þá var það afi minn (og nafni) sem fékk þetta bréf. Afi sá um rekstur rafveitunnar á Núpi í Dýrafirði í mörg ár. Þarna lítur út fyrir að hafi orðið rafmagnslaust og ekki allir verið alveg sáttir við það…

Ég lofa

svo því að hætta að tala um garðhliðið (í nokkrar færslur) eftir þessa færslu.

Meðan ég var að mála hliðið og handriðið þá þvældist fullt af fólki fram hjá. Meðal annars var ein kona sem stoppaði. Horfði á mig smá stund og sagði svo (áhyggjufull): Þú veist að það þarf að hreinsa ryðið burt áður en þú málar!

Ég fullvissaði hana um að ég vissi alveg hvað ég væri að gera. Það væri óhætt að mála beint á ryð með þessari málningu.

Framsóknarbíllinn

Sá hann í kvöld í Kömbunum á leið heim frá Skálholti. Einhver svakalega kubbslegur bíll. Svipaður að stærð en kassalagaðri en Chrysler PT Cruiser og er þá mikið sagt. Hef semsagt ekki hugmynd um af hvaða tegund þessi bíll var. Sá samt að aftan á bílnum stóð XB.

Ef ég væri Frakki myndi ég skjóta þig núna!

Þetta fékk ég að heyra frá Ragga syni Esterar vinkonu okkar í útskriftar veislunni hennar í gær. Ástæðan: ég sagði við hann að ég ætlaði að skipta yfir í hvítvín úr rauðvíninu. Mér tókst nú að fá hann til að gefa mér hvítvínsglas með því loforði að ég fengi mér millirétt áður en ég byrjaði á glasinu.

Palindrome

er það ekki góð þýðing á spegilorði?

Brjálað útvarpstæki

Bíltækið okkar er farið að haga sér mjög undarlega upp á síðkastið. Ef maður spilar diska þá tekur það upp á því, fyrirvaralaust, að skipta yfir á útvarpsstöð. Ekki bara hvaða útvarpsstöð sem er heldur alltaf á Bylgjuna! Bylgjuna! Ég veit ekki hvað við höfum gert af okkur til að verðskulda þetta.

Jei,

kominn í páskafrí! Kom í ljós að ég átti inni nokkra frídaga (frídagarnir, sem ég hafði samið um höfðu verið rangt skráðir og ég ruglast í talningunni). Allavega, hélt að ég væri á núllinu en kom í ljós að þetta safnaðist saman í átta frídaga. Þokkalega kúl. Bottomlæn, fæ alvöru páskafrí og á samt eftir fjóra daga. Má notast við það.

Klikkaður dagur

Vakna kl. 7:30. Borða morgunmat og gera sig kláran í vinnuna. Mættur um 9 í vinnuna. Heim aftur upp úr kl. 17. Skjótast aðeins út í búð og kaupa nokkur smáatriði. Sparsla og pússa í herberginu hennar Freyju. Kvöldmatur um kl. 19. Fótbolti kl. 19:40. Kominn heim aftur um 21. Sparsla og pússa meira í herberginu hennar Freyju. Til rúmlega 22. Búa til jógúrt og nesti fyrir morgundaginn. Búinn að því um 11. Þá loksins pása. Spilaði nokkra skítakalla við Fífu. Alveg búinn. Núna bara bólið.

Nauðsynlegur

búnaður þegar verið er að sparsla og skrapa.

Við erum að taka herbergið hennar Freyju í gegn. Taka veggfóðursborðann og skipta um lit. Freyja er harður verkstjóri og rekur mann miskunnarlaust áfram.