Klikkaður dagur

Vakna kl. 7:30. Borða morgunmat og gera sig kláran í vinnuna. Mættur um 9 í vinnuna. Heim aftur upp úr kl. 17. Skjótast aðeins út í búð og kaupa nokkur smáatriði. Sparsla og pússa í herberginu hennar Freyju. Kvöldmatur um kl. 19. Fótbolti kl. 19:40. Kominn heim aftur um 21. Sparsla og pússa meira í herberginu hennar Freyju. Til rúmlega 22. Búa til jógúrt og nesti fyrir morgundaginn. Búinn að því um 11. Þá loksins pása. Spilaði nokkra skítakalla við Fífu. Alveg búinn. Núna bara bólið.

Nauðsynlegur

búnaður þegar verið er að sparsla og skrapa.

Við erum að taka herbergið hennar Freyju í gegn. Taka veggfóðursborðann og skipta um lit. Freyja er harður verkstjóri og rekur mann miskunnarlaust áfram.

Formúlan

byrjaði með stæl í morgun með Ástralíukappakstrinum. Ég var nú ekki með neinar væntingar til minna manna, því þeim hafði gengið herfilega á æfingum fyrir keppnina. Þó fór svo að Hamilton náði að komast upp í þriðja sæti úr því átjánda, sem hann lagði af stað úr. Þar hjálpaði nú til að allmargir keppendur féllu úr leik. Ýmist vegna bilana eða þá að þeir ákváðu að nota self destruct takkann í stýrinu hjá sér.

Annars held ég að reglugerðarbreytingarnar, sem gerðar voru fyrir tímabilið séu af hinu góða. Í meginatriðum gengu þær út á að minnka loftaflsgrip bílanna en auka mekanískt grip. Lítur út fyrir að ökumenn geti fylgt andstæðingnum betur eftir með þessu móti. Brautin í Melbourne hefur nú ekki verið þekkt fyrir mikinn framúrakstur en í morgun var annað uppi á teningnum. Hörkuskemmtileg keppni og það á braut, sem að mínum dómi er ein sú alleiðinlegasta.

Verður svo spennandi að sjá hvernig þetta kemur út á brautum þar sem þó var hægt að taka fram úr áður.

Illgresi

Ég veit að þið trúið þessu ekki en ég þurfti að reyta arfa í garðinum núna í vikunni! Sóleyjarnar (skriðsóleyjar) sem ég hef verið að berjast við hérna í garðinum frá því við fluttum hingað voru komnar á stjá. Fann fjögur eða fimm eintök, sem voru orðin vel þroskuð. Og það er mars! Maður á ekki að þurfa að reyta arfa í mars!

Nokkrar Loppumyndir

Í gærkvöldi þegar við vorum að borða var svo heitt að við vorum öll alveg að bráðna. Opnuðum eldhúsgluggann til að kæla okkur niður. Loppa náttúrlega mætti á svæðið eins og skot og valsaði inn og út um gluggann. Þangað til að henni datt í hug að klifra upp á hann og svo í framhaldi af því upp á annan glugga á stigaganginum upp á risið. Hérna nokkrar myndir, sem Freyja tók.

Berstrípuð

Það er jólastjarnan okkar eftir yfirhalninguna, sem ég gaf henni um helgina Hún var orðin svo gisin að ég ákvað að klippa hana rækilega niður. Svona lítur hún út núna:

Gleymdi að sjálfsögðu að taka af henni myndir áður en klippurnar fóru á loft.

Tómt, alveg tómt

Á leið minni á hjólinu í vinnuna fyrir nokkrum dögum þá var sólin rétt að koma upp þegar ég kom út á hjólastíginn við Sæbrautina. Nýi turninn við Höfðatorgið var á milli, sólin skein í gegnum hann og lýsti upp allar galtómu hæðirnar.

Silfurskeið

Ég held að nýi tilvonandi formaður Sjallanna ætti að taka silfurskeiðina út úr munninum áður en hann talar. Það er svo fjandi erfitt að skilja hann svona.

Dirty Loppa

Um síðustu helgi þá fann Loppa eitthvað algjört drullusvað. Kom síðan inn og sporaði allt út. Ég rakst á slóð inni á gangi frá kattalúgunni, inn í sjónvarpsherbergi inn í útganginn hjá þvottahúsinu, þar upp í gluggakistu (með tilheyrandi spólförum á veggnum. Þar hafði hún stikað fram og til baka í gluggakistunni. Niður aftur og að þröskuldinum að geymslunni niðri. Þar hvarf slóðin. Ég var ekki par hrifinn, náði samt í tusku og hreinsaði slóðina upp. Einum eða tveimur tímum síðar þá átti ég leið í gegnum sjónvarpsherbergið og sá nokkur spor. Hugsaði fyrst með mér að ég hefði misst af nokkrum sporum. En nei, nei. Þá hafði hún brugðið sér út í leðjusvaðið og komið inn aftur. Nú lá slóðin upp stigann inn í eldhús og borðstofu. Þar var hún þó stoppuð áður en hún náði að komast inn í stofu og upp í sófann.

Aukafærsla

Var búinn að kaupa afmælisgjöfina, vídeótökuvél fyrir langalöngu. Svona til að Hildigunnur fengi nú samt smá pakka þá keypti ég nú þennan öskubakka, nei ég meina kertastjaka…

Vissi að henni leist vel á hann.

Afmælið

hennar Hildigunnar eftir nokkrar mínútur. Innilega til hamingju með 27 ára afmælið, ástin mín!

Skilgreining

á forritara:
Vél, sem breytir kaffi í kóða.

Síðbúin

afmælisgjöf frá Finni.

Þetta var hann búinn að vera að dunda sér við að gera (með smá aðstoð ömmu sinnar) síðan einhvern tímann fyrir jól. Hann fór síðan í heimsókn til ömmu sinnar og afa um síðustu helgi og þá var rekið smiðshöggið á verkið.

Rann á okkur

smá kaupæði áðan, eins og Hildigunnur segir frá hér. Þetta hefur nú staðið lengi til hjá okkur en ekki komist í verk fyrr en nú. Einhvern veginn var bara rétti tíminn áðan og þegar við rákumst á eina ljósakrónu, sem okkur leist báðum vel á var ekki aftur snúið.

Búinn svo að hengja upp ljósakrónuna. Mikill munur frá gamla ljósinu, sem passaði hreint afleitlega við húsið.

Allt annað að sjá borðstofuna með nýju ljósakrónunni.

Sólarkaffi

Sá sólina gægjast aðeins í gegnum lituðu rúðurnar á bíslaginu hjá okkur. Getum þá haft sólarkaffi með góðri samvisku.

Fann

þetta í síðasta helgarblaði.

Átti greinilega ekki að gleyma Psych.

Féll

í freistni í morgun og fór á bílnum í vinnuna. Kalt, rok og snjór úti. Og þegar Hildigunnur spurði mig hvort ég vildi ekki bara fara á bílnum þá þurfti nú ekkert mikið til að sannfæra mig. Ég veit, ekki mikil reisn yfir þessu. Nokkur snjókorn og þá gefst maður upp og tekur bílinn. Svolítið þægilegt bara samt að vera á bíl svo ekki sé meira sagt. Sagði svo við Hildigunni að maður gæti jafnvel vanist á þetta. Henni leist nú svona og svona á það.

Hvað

er svo að gerast bæði á Selfossi og í Sandgerði. Fólk barið í klessu í skólunum og sökudólgarnir fá nánast klapp á bakið! Nú þekkir maður ekki forsöguna en a.m.k. á Selfossi er þetta ekki í fyrsta skipti, sem viðkomandi eru staðnir að ofbeldi í skólanum. Þvílík skilaboð sem eru send til nemenda.

Ég skil heldur ekki af hverju má ekki reka viðkomandi úr skólunum. Líklega erfiðara í Sandgerði út af fræðsluskyldu en hvað með rétt annarra nemenda til að stunda sína vinnu í friði fyrir ofbeldismönnum?