Vona

að takist að halda áfram framleiðslu á bjórunum frá Ölvisholti þótt brugghúsið hafi farið á hausinn. Langferskasta og besta brugghús landsins að mínu mati. Móri alveg klárlega uppáhalds íslenski bjórinn minn. Yrði sjónarsviptir ef hann hyrfi af sjónarsviðinu ásamt Freyju, Skjálfta og Lava.

Var ekki

búinn að henda inn mynd af nýja hjólinu mínu, sem ég náði að kaupa áður en það gamla kom í leitirnar eftir stuldinn.

En semsagt svona lítur nýi gripurinn út:

Eðalhjól, létt og meðfærilegt.

Þriggja eins stafa

í röð íslensk orð eru nokkur til. Var að spá í að safna saman eins mörgum eins og hægt er.

Þau sem ég man eftir í svipinn eru:

alllengi
alllangur
valllendi
toppplata
blikkklæðning

Ekkert voðalega mörg. Ég veit að þau eru mörg fleiri til. Líka spurning hvort til eru fleiri samsetningar en lll, ppp og kkk. Mmm alveg örugglega til. Man bara ekki eftir slíku tilfelli akkúrat núna.

Séð í

bílaauglýsingu í Fréttablaðinu í morgun: …búið að skipta um tímareim, smjör og þjónustubók…

Já, einmitt smjörbókin!

Grrr frh.

Eftir að hjólinu mínu var stolið um daginn þá fékk ég hjólið hennar Freyju lánað til að hjóla í vinnuna í tvær eða þrjár vikur. Það var náttúrlega ekki hægt að níðast á henni endalaust þ.a. þegar hjólaútsölur byrjuðu þá fór ég á stúfana og fann ágætis götuhjól í Útilífi fyrir 60.000 kall (kostaði upphaflega 80.000). Þurfti svo að kaupa aukahluti, bretti, lás, bjöllu og endaði í næstum 80.000 kalli. Ekki slæmt samt. bjóst alveg við að þurfa að fara eitthvað yfir 100 kallinn til að fá þokkalegt hjól.

Við ákváðum svo á þriðjudaginn var að kíkja á óskilamuni lögreglunnar áður en við færum að reyna að kreista einhverja aura út úr tryggingafyrirtækinu. Eftir smá leit þar rak ég augun í hjólið mitt. Þurfti reyndar smá rekistefnu til að fá það afhent af því ég átti hvorki reikning (keypti það á uppboði lögreglunnar) né var með stellnúmer (hafði aldrei komið því í verk að skrifa það niður). Gekk nú samt upp að lokum.

Þannig að í staðinn fyrir ekkert hjól fyrir nokkrum dögum þá er ég núna með tvö hjól.

Plastkaffi

Uppgötvaði í morgun þegar ég kom upp að kaffið var búið! Eftir æðisgengna leit tókst mér að grafa upp eitthvað eldgamalt plastkaffi. Það var svo mikið gervikaffi að það þoldi ekki nema 80° heitt vatn. Gæti neyðst til að fara og fá mér espresso, svona þegar einhvers staðar verður opnað á eftir.