Strč prst skrz krk

2008-05-7

Texas hold ’em

Filed under: Dægradvöl — Jón Lárus @ 21:30

Bjössi bróðir sagðist ætla að kynna okkur fyrir nýjum leik fyrir nokkru. Við vorum alveg til í það. Alveg til í smá tilbreytingu frá Tribbanum og Skraflinu, sem við spilum oftast. Síðan mætti hann með pakka fullan af spilapeningum og kenndi okkur Texas hold ’em póker. Við höfðum aldrei spilað þessa útgáfu af póker áður. Var bara mjög skemmtilegt. Get samt ímyndað mér að þetta sé stórhættulegt. Nógu var það spennandi með spilapeninga, veit ekki hvernig það væri með alvöru peninga.

Auglýsingar

2008-05-2

Trivial gullkorn

Filed under: Dægradvöl — Jón Lárus @ 22:10

Við tókum einn Tribba fyrir nokkrum kvöldum. Hildigunnur var búin að segja frá tveimur eða þremur kommentum, sem ulltu upp úr Finni.

Fífa átti líka sína spretti. Hvað haldið þið t.d. að hafi verið spurt um þegar hún svaraði: „Jói risi, sjoppan, beljan og hjólabúðin“?

2008-04-19

Tapsár gaur

Filed under: Þættir,Dægradvöl — Jón Lárus @ 00:25

eða verður það þegar hann tapar. Horfðum á Útsvar í kvöld og þessi Vilhjálmur í Garðabæjarliðinu er um það bil sá tapsárasti sem ég hef séð (eða verður það þegar liðið dettur út). Minnir mig á Jean Todt, fyrrum liðstjóra Ferrari liðsins í jöfnu1 keppninni. Skeifan á honum skrapaði alltaf gólfið þegar gekk illa.

2008-04-11

Røben

Filed under: Brandarar,Dægradvöl — Jón Lárus @ 12:38

Við Hildigunnur vorum að hlusta á Orð skulu standa þáttinn í gærkvöldi. Eins og oft áður voru keppendur spurðir að merkingu orða úr pétrísk-íslenskri orðabók (samin af Pétri man ekki hvers son, sem er prestur í óháða söfnuðinum ef ég man rétt). Annað liðið fékk spurninguna: Hvað stendur Røben fyrir í PÍ orðabókinni? Svarið var síðan Raufarhöfn. Við Hildigunnur ætluðum ekki að verða eldri.

2008-03-29

Vísbendingaspurningarnar

Filed under: Dægradvöl,Fjölskyldan — Jón Lárus @ 22:37

í Lifandi vísindum eru erfiðar í nýjasta blaðinu.  Við Hildigunnur fáum alltaf Fífu til að spyrja okkur spurninganna.  Náum yfirleitt að skora svona 23-26 stig en núna ekki nema 20!  Man ekki eftir nema svona tveimur skiptum þar sem við höfum verið slakari.

2008-03-21

Páskaeggjagerð

Filed under: Dægradvöl,Fjölskyldan,Hátíð — Jón Lárus @ 12:41

Við Fífa ákváðum að gera tvö páskaegg fyrir þessa páska, ekki eitt eins og í fyrra. Við vorum algerlega búin að gleyma hvernig við fórum að þessu. Tók nokkrar tilraunir að ná tökum á þessu aftur. Við komumst meðal annars að því að það þýðir ekki að búa til egg bara úr rjómasúkkulaði (Fífa vildi endilega hafa sitt egg úr slíku súkkulaði), því það er ómögulegt að ná því úr forminu. Þetta vesen kostaði eitt egg, sem við neyddumst til að borða.

Það sem við gerðum til að leysa það mál var að gera fyrst þunna skel úr suðusúkkulaði og hjúpsúkkulaðiblöndu. Síðan gerðum við innri og þykkari skel úr rjómasúkkulaði. Þetta kom vel út og enginn vandi að ná egginu úr forminu með þessari aðferð. Í fyrra áttum við ekki fót og létum eggið liggja. Núna bættum við úr því og fengum okkur form til að gera fót. Fífa vildi endilega hafa gamaldags, massífan fót. Gerðum hann eins og eggið, með þunnri suðusúkkulaðiskel og svo fyllt upp með rjómasúkkulaði.

Ég notaði hins vegar 70% súkkulaði í mitt egg, eins og í fyrra. Aðalmunurinn er að við höfðum 2 lög. Seinna lagið sett aðallega hjá samskeytunum til að fá þykkar brúnir. Í fyrra var það helsta vandamálið, sem við áttum við að stríða. Þá létum við heldur ekki súkkulaðið kólna í ísskápnum eftir að hafa brætt það heldur kældum við það í forminu og veltum fram og aftur (mjög tímafrekt og leiðinlegt). Núna skelltum við súkkulaðinu bara inn í ísskáp í 10-12 mínútur eftir að hafa brætt það. Síðan smurðum við súkkulaðinu í formið og settum það svo á hvolf ofan á bökunarpappír. Þegar eggið var búið að taka sig aðeins hentum við því síðan aðeins inn í frysti. Ég var reyndar pínu óþolinmóður, beið ekki nógu lengi og skemmdi brúnirnar aðeins.

Síðan nokkrar myndir af eggjagerðinni, Fífu egg fyrst:

Helmingarnir

Fóturinn

Allir hlutarnir og fylling

Eggið samsett og skreytt

Síðan mitt egg:

Mitt egg

Útlitið talsvert flottara en í fyrra en samt urðu smá mistök í samsetningunni…

2008-01-7

Meira neysluæði

Filed under: Ýmislegt,Dægradvöl — Jón Lárus @ 00:16

Pantaði frá Amazon í gær nokkra DVD diska. Meðal annars afmælisgjöfina fyrir Hildigunni. Síðan voru nokkrir diskar, sem mig hefur lengi langað í, á þvílíkum afslætti að það var ekki hægt annað en panta þá líka. Delikatessen, Amélie og svo fékk Fífa að lauma einum diski í pöntunina.

Hlakka ekki smá til að fá þetta dót í hendurnar.

2007-10-19

Útsvarið

Filed under: Dægradvöl,Fjölskyldan — Jón Lárus @ 21:46

Gerðumst áhorfendur að beinni útsendingu í sjónvarpinu áðan. Þorbjörn mágur keppir fyrir hönd Fljótsdalshéraðs, sem öttu kappi við Álftnesinga. Ég hafði ekki séð neinn af þessum þáttum áður og bjóst svosem ekki við neinu. En svo reyndist þetta bara bráðskemmtilegt. Þorbjörn fór á kostum í leikatriðinu. Ekki spillti svo fyrir að liðið hans vann.

Finnur tók smá skorpu í útsendingunni. Nánari lýsing hjá Hildigunni á eftir.

2007-10-11

Skítakall

Filed under: Dægradvöl,Fjölskyldan — Jón Lárus @ 23:55

heitir nýja spilið sem Fífa kenndi mér í dag. Þetta er svona dæmigert frímínútnaspil eins og maður spilaði ótölulega í MH forðum daga. Spilin sem voru spiluð mest þar voru gúrka og hjarta. Búinn að gleyma þeim samt. Hef ekki spilað þau í mörg ár.

Ekki samt viss um að Fífa vilji spila þetta aftur við mig því ég grísaði alltaf á að vinna hana. Svo spilaði ég líka eitt skipti við Hildigunni og vann hana líka. Greinilega ekki bara byrjandaheppni. Hæfileikar hér…

2007-06-2

Neðan

Filed under: Afmæli,Dægradvöl,Fjölskyldan — Jón Lárus @ 23:12

úr sjónvarpsherberginu berast nú þvílíkir píkuskrækir. Fífa bauð nokkrum vinkonum sínum í afmæli. Fyrst í mat og svo gláp. Þær voru að enda við að horfa á Moulin Rouge. Síðan á að horfa á einhverja hryllingsmynd. Skrækirnir minnka væntanlega ekki við það…

2007-05-19

Fyrsti

Filed under: Dægradvöl,Garðurinn,Veðrið — Jón Lárus @ 00:20

dagurinn á pallinum áðan. Alltaf jafn gaman þegar veðrið fer fram úr spánum. Ég var nákvæmlega búinn að olíubera garðhúsgögnin þannig að þetta passaði fullkomlega. Var meira að segja ekki búinn að henda út garðborðinu fyrr en ég kom heim úr vinnunni.

2007-05-17

Núna

Filed under: Þættir,Dægradvöl — Jón Lárus @ 22:30

ætlum við að fara að horfa á Heroes. 2 þættir sem við erum ekki búin að horfa á. Það verður að minnsta kosti horft á annan og ég verð hissa ef við stöndumst freistinguna að horfa á hinn líka.

Freyja

Filed under: Dægradvöl,Ferðalög,Fjölskyldan,Frí — Jón Lárus @ 14:37

klukkaði mig. Best að svara listanum hennar (þó Hildigunnur sé nú reyndar búin að því líka).

1. Já
2. Við förum öll til Ítalíu, nánar tiltekið til Rómar og Le Marche.
3. Við verðum rétt tæpar tvær vikur.
4. Já, þetta er í fjórða skipti, sem ég kem þangað.

2007-04-19

Grísari dauðans

Filed under: Dægradvöl,Fjölskyldan — Jón Lárus @ 23:25

Við Hildigunnur vorum að spila Trivial áðan og ég grísaði þvílíkt allan tímann. Fyrir utan að hitta mjög fljótt á kökureitina og fá skítléttar spurningar á þeim öllum þá svaraði ég rétt tveimur spurningum sem ég misskildi. Fyrst: Hvað samdi Tjækofskí margar óperur (og ég tók það sem sinfóníur)? Var gefið upp 5, 10 og 15. Svaraði 10 en hefði svarað 5 ef ég hefði fattað að þetta væru óperur. Síðan: Hvaða íþróttagrein æfðu Hayden Christiansen og einhver annar leikari í 2 mánuði fyrir tökur… Og ég svaraði skylmingar og gerði ráð fyrir að þetta væri Hringadrottinssaga. Svarið var rétt en þetta var Star Wars. Mesta furða að sleppa við barsmíðar eftir svona grísa.

2006-12-5

Nýi

Filed under: Dægradvöl — Jón Lárus @ 22:08

Bond er bara drullugóður. Ég verð að viðurkenna að ég bjóst ekki við miklu en þetta fór langt fram úr mínum björtustu vonum. Fórum semsagt við hjónin og unglingurinn á Bond um helgina.
Held að við höfum ekki farið í bíó (þ.e.a.s. ég og Hildigunnur) síðan við fórum á Incredibles fyrir einu og hálfu ári og þar áður á Hringadrottinssögu.

2006-10-17

Adrenalíngarðurinn

Filed under: Dægradvöl,Vinnan — Jón Lárus @ 23:27

Ég fór ásamt deildinni minni í Adrenalíngarðinn á laugardaginn. Hinn árlegi haustfundur upplýsingadeildar. Til að berja mannskapinn saman þá er alltaf farið í eitthvað svona útivistardæmi. Í fyrra var það rafting, í ár Adrenalíngarðurinn.

Veðrið var alveg ömurlegt, hávaðarok og rigning. Þannig að það var ekki hægt að fara í nema hluta af tækjunum. Við fórum í 3 mismunandi tæki. Fyrst var það klifurveggurinn. Hefði líklega ekki verið neitt sérstaklega erfiður nema útaf veðrinu. Innan við helmingur komst upp á topp (skrifstofublækur hvað). Einn í minni línu lenti í því að fjúka útfyrir klifurvegginn á leiðinni niður. Hann spyrnti sér heldur hraustlega frá veggnum um leið og kom vindhviða. Fékk víst einhverja marbletti við þá lendingu. Síðan átti að klifra upp staur og standa svo uppi á honum. Vegna hvassviðrisins voru ekki nema örfáir sem náðu því. Flestir fuku niður þegar átti að taka síðasta skrefið. Að lokum var svo farið í risaróluna. Það var náttúrlega ekki hægt annað en að fara á hvolfi í hana. Mjög sérstök sýn á landið að dingla svona á hvolfi í 10 m rólu.

2006-08-17

Sudokur

Filed under: Dægradvöl — Jón Lárus @ 22:53

Ekki smá sem sudokurnar eru erfiðar í Fréttablaðinu þessa dagana. Ég hef verið að kíkja á þær að undanförnu í fríinu. Get ekki séð að það sé alltaf hægt að leysa þær nema að giska á tölur í sumum tilvikum (þegar ég er búinn að fylla út allt sem hægt er og skoða svo alla reiti, sem eftir eru með tilliti til þess hvaða tölur geti komið þar fyrir). Nema það sé eitthvað trikk við lausnirnar sem ég kann ekki.

2006-07-2

Klukk

Filed under: Dægradvöl,Lestur — Jón Lárus @ 23:06

Alveg rétt. Hildigunnur klukkaði mig fyrir langalöngu. Svo gleymdi ég að svara klukkinu 23. júní og bloggaði ekki neitt 29. þ.a. það er ekki fyrr en nú sem ég get svarað þessu.

1. Hvaða bók hefur haft mest áhrif á þig?
Þokkalega erfið spurning. Man ekki eftir neinni einni sérstakri.

2. Hvernig bækur lestu helst?
Það er nú svona ýmislegt. Ég er alltaf með nokkrar bækur í gangi í einu. Finnur kallar þetta að lesa röndótt. Ég er nánast alltaf að lesa 1 til 2 reyfara. Því til viðbótar eru þá alls konar bækur: Tæknibækur, tímarit, handbækur, ferðabækur…

3. Hvaða bók lastu síðast?
Síðasta bók, sem ég kláraði var Striptease eftir Carl Hiaasen. Bækurnar á náttborðinu núna eru síðan: Crossbones eftir Kathy Reichs og Ástríkur í Bretalandi (á ítölsku reyndar). Var svo rétt áðan að byrja að lesa bók um viskí, Single Malt & Scotch Whisky eftir Daniel Lerner. Svo er ein bók sem ég er að þræla mér í gegnum: Cryptography, Theory and Practice eftir Douglas R. Stinson. Góð bók en erfið. Sé fyrir mér margra mánaða verkefni.

2006-05-13

Matarboð

Filed under: Þættir,Dægradvöl,Matur — Jón Lárus @ 23:13

Vorum í matarboði í kvöld hjá vinkonu okkar. Góður matur. Grill og meððí og snilldar félagsskapur. Frábært kvöld. Er núna að fara að horfa á Lost og síðan að sofa. Enn svolítið eftir mig eftir árshátíð LHÍ.

2006-05-11

Strengir

Filed under: Dægradvöl,Hjólreiðar,Tónlist — Jón Lárus @ 23:48

Jú, jú nóg af þeim í Mahler 6 í kvöld.

Annars líka nóg af þeim í skrokknum á mér eftir að hafa hjólað í vinnuna núna í tvo daga 😉

Bloggaðu hjá WordPress.com.