Algengi

Ekkert smá hryllilega ljótt orð og í flestum tilvikum líka algerlega óþarft. Hægt að nota t.d. tíðni í staðinn. Pirrar mig óendanlega þegar ég sé þetta orðskrípi. Sama má svo segja um aðgengi.

Ái

Mbl.is þarf varla á prófarkalesurum að halda meðan þeir eru með skrifara á borð við þennan, eða hvað?

„Webber slasaðist er hann varð fyrir bíl í fjölþrautarkeppni í Tasmaníu í dag, en sjálfur reið hann torfæruhjóli. Brotnaði bein í hægri löpp og gekkst hann undir aðgerð vegna þess í dag. Komið var stálpinna fyrir í löppinni til að styðja við beinið meðan það gróir saman.“

Það þarf einbeittan brotavilja til að hnoða svona ósköpum saman.

Ósköpin eru ekki búin:

„Hann var fluttur með þyrlu á sjúkrahús og fyrstu fregnir af slysinu voru á þá lund að hann hefði slasast alvarlega og hlotið beinbrot hér og þar um líkanna.

Síðar kom í ljós, að einungis brotnaði eitt bein í hægri löpp. „Mark er hress og að beinbrotinu frátöldu er hann vel á sig kominn.““

Hvar ætli mbl.is hafi fundið þennan snilling?

E-x skammstafanirnar

Mér finnst frekar dapurlegt þegar fólk notar þessar skammstafanir án þess, greinilega, að hafa hugmynd um hvernig þær eru myndaðar. Ég fæ t.d. oft tölvupósta þar sem fram kemur skammstöfunin e-h (því miður frá fleiri en einum sendanda). Veit ekki hvað það á að þýða, líklega einhver en er samt ekki viss.

Eins og mér finnst þetta flottar skammstafanir.

Rá-ró

Sá í Fréttablaðinu í gær var umfjöllun um ráð gegn felguþjófum. Besta mál, nema í greininni var talað um rá og rár í staðinn fyrir ró og rær! Ég hef nú bara sjaldan séð önnur eins ósköp. Veit ekki hvort þetta var blaðamaðurinn eða sölumaðurinn sem vita ekki hvað ró og rær eru!

Sögulegt hámark

hvað ég þoli ekki þennan frasa, sem tröllríður öllu þessa dagana. Síðast á forsíðu Fréttablaðsins í fyrradag. Hvað er með: Hefur aldrei verið hærra/meira/stærra? Líklega hefur þessi frasi orðið til í einhverju bríaríi. Var kannski fyndinn í eitt skipti eða tvö en algerlega búinn að missa bitið.

Nöldur.is

Orkustöðvar

Forsetinn var eitthvað að velta fyrir sér um daginn hvað ætti að kalla bensínstöðvar þegar þær væru farnar að selja ýmis konar eldsneyti annað en bensín. Ég hef nú kallað þetta orkustöðvar í mörg ár og finnst það alveg gefið nafn. Örugglega mörgum búið að detta þetta í hug.

Arinpumpa

Þetta verkfæri rákumst við á í Europris í gær. Líklega hefur sá sem skrifaði vörulýsinguna ekki þekkt orðið físibelgur.

Í

Held að þessi forsetning sé deyjandi. Maður heyrir varla lengur fólk segja í mörg ár. Alltaf til margra ára. Mér finnst þetta synd.

Málblóm

Eftirfarandi heyrðist í formúluútsendingu í morgun í sjónvarpi allra landsmanna:
Brautin er ekin í öfugan klukkugang! Líklega var verið að reyna að þýða counterclockwise, með þessum hörmulegu afleiðingum.
Síðan:
Hann ekur hratt, svona tímalega séð!

Ok, ég veit að þetta er bein útsending en þetta er bara ekki nógu gott. Fyrir utan að umsjónarmennirnir missa trekk í trekk af augljósum atriðum. Gerist í hverri einustu keppni. Eitthvað gerist í brautinni og tekur óratíma þar til gaurarnir, sem eiga að segja okkur hvað er að gerast átta sig á því. Tók þá til dæmis um mínútu að taka eftir einu ákveðnu atriði í morgun.

Þetta ætti ekki að vera flókið. Þeir eru tveir og með nettengda tölvu fyrir framan sig. Með því að skipta með sér verkum þ.a. annar fylgist bara með tímunum (ótrúlega mikið, sem hægt er að sjá bara með því) og hinn bara með myndinni þá ættu þeir að ná að dekka þetta.

Þar að auki finnst mér að ætti að leggja þessari Imolabraut (Karþagó lögð í eyði hvað?).

Eru allir stafir hvorugkyns?

Eru allir stafir hvorugkyns?