Bruðl

Mættum á Laugarnesveginum í morgun einum risapallbíl. Með einkanúmerinu: BRUÐL. Greinilegt að þessi var með smá húmor fyrir sjálfum sér.

Hringekjan

Enn einu sinni er búið að taka einhver af eftirtöldum fyrirtækjum: SKÝRR, Kögun, Eskil, Landsteina-Streng og Teymi, setja í poka. Hrista svolítið. Hella úr pokanum og sjá hvað kemur út. Liggur við að eina fyrirtækið í bransanum, sem fái ekki að vera með sé Tölvuþjónusta Akraness (ok, ok HugurAx og TM software ekki heldur). Svona í lok kapalsins þá er Þórólfur Árnason alltaf látinn fjúka.

Brjálæðið í þvottahúsinu

Nú er ég búinn að vera þrjár vikur að vesenast í þvottahúsinu. Verkefnið ca. hálfnað og það er smátt og smátt að komast mynd á þetta. Hérna eru nokkrar myndir eins og staðan er í dag:

Orðið þokkalega snyrtilegt hjá þvottavélunum, enda lögð ofuráhersla á að klára það svæði fyrst.

Skorsteinshornið ekki komið alveg eins langt.

Ekki mikið búið að gerast hjá rafmagnstöflunni og hitaveitugrindinni.

Gluggaveggurinn ennþá fangelsisgrár.

Þarf svo að grafa upp myndirnar, sem voru teknar áður en ég byrjaði (svolítið langt síðan þær voru teknar). Hendi þeim inn þegar þetta verður búið.

Loppa

er komin með nýjan uppáhaldsstað. Hana er oftast nú að finna í litlum stól, sem Finnur á.

Hún kann svo alveg þetta með að láta fara vel um sig…

Blogn

Þetta orð varð til hjá okkur Hildigunni fyrir einu eða tveimur árum síðan. Þetta valt upp úr mér óvart og Hildigunnur var með skýringu á reiðum höndum: Lítil virkni á bloggi.

Lítil virkni á blogginu undanfarið á sér sínar skýringar. Ég er ekkert hættur að blogga. Hef bara verið mjög önnum kafinn í smíðaverkefni í húsinu síðustu tvær vikur og hefur fátt annað komist að. Það kemur örugglega montfærsla þegar verkefninu er lokið. Að þessu sinni mundi ég meira að segja eftir því að taka fyrir myndir. Svo er bara spurning um hvort þær finnist.

Byggingarvörur

eru orðnar alveg fáránlega dýrar. Ég er búinn að vera að lagfæra aðeins þvottahúsið okkar og þurfti að kaupa nokkrar gifsplötur. Gerði ráð fyrir að þær myndu kosta svona 1500 kall stykkið í allra hæsta lagi 2000 kall. Nei, þá kostar hver plata 3000 krónur! Alveg út í hött. Hráefnið í þetta kostar nánast ekki neitt. Gifs verður m.a. til sem úrgangsefni við keyrslu kolaorkuvera.

Algjörlega

niðursokkinn í síðustu Stieg Larsson bókina. Fékk hana til baka úr láni í fyrradag. Byrjaði strax á henni og límdist undir eins við hana.

Gráðostur

Mér fannst ég vera þannig myglaður áðan, áður en ég skellti mér í sturtu…

Slappt ástand

á heimilinu þessa dagana. Finnur var veikur fyrir helgi og svo tókum við Hildigunnur við á sunnudaginn. Erum svona aðeins að skríða saman núna. Á meðan þá er algjört lúxuslíf á Fífu. Fær bílinn í skólann og á æfingar. Er viss um að á morgun kemur: Eruð þið ekki ennþá slöpp og er nokkuð jarðarför hjá þér mamma?

Ég er ekki

með James Bond komplex. Það þurfti samt að stafa það ofan í eftir að hafa mætt á barinn á Samskipaárshátíðinni áðan í smóking og beðið um dry martini, kokteilinn…

Loppa

heldur svo að hún sé sfinx og lggiur fyrir faman lyklaborðið. Erfitt að blogga þannig…

Stelpurnar voru góðar

við mig áðan. Ég kom nær dauða en lífi úr boltanum og þá voru þær búnar að henda öllu uppvaskinu í uppþvottavélina og keyra hana. Ekki slæmt að verða fyrir svona.

Tóneyra?

Það er spurningin.

Mig langar

í svona borgara. Hildigunnur, er ekki frjáls dagskrá á matseðlinum á föstudaginn?

Sláturgerð

Dagurinn í dag fór að mestu leyti í sláturgerð. Tókum 5imm slátur með mömmu og hjálpuðumst að við lifrarpylsu og blóðmörsgerð í dag. Vorum frá eitthvað um hálf 2vö til að verða 6ex að vesenast. Ekki kannski það skemmtilegasta sem maður gerir (svona svipað eins og að hreinsa sveppi) en vel þess virði. Að minnsta kosti er maður alltaf feginn þegar þetta er búið. Klikkt svo út með sviðaveislu í kvöldmat. Ekki slæmt.

Jei II

Fífa massaði bílprófið. Höfum ekki mátt segja neitt fram að þessu. En semsagt nú er það opinbert. Bros!

Jei!

Fyrsti sigurinn hjá mínu liði í innanhússboltanum á tímabilinu. Mjög sætt því ég hafði verið í tapliðinu í fyrstu fjórum tímunum. Þess þá heldur þar sem tveir síðustu leikir höfðu tapast mjög naumlega.

Brotin flaska

Okkur var boðið í matarboð hjá Ester og Snorra, vinum okkar um helgina. Kipptum með einni rauðvínsflösku og settum hana í gjafapoka. Ég lagði pokann frá mér í hugsunarleysi fyrir aftan Hildigunni á meðan ég klæddi mig í skóna. Hún náttúrlega hreyfði sig aðeins, rakst í pokann, þannig að hann fór á hliðina. Það heyrðist smá brothljóð og svo byrjaði að blæða úr pokanum. Eftir nokkrar sekúndur var gangurinn einn stór vínpollur. Við þurftum náttúrlega að hreinsa upp sullið og sem betur fer áttum við aðra flösku og annan poka til að taka með okkur. Held svei mér þá að ég hafi ekki lent í því áður að brjóta vínflösku.

Hot Cross Camp Yoga

Eða kannski Hot Boot Fit Yoga. Spurning hvort maður setur ekki saman eitt svona kerfi og mæti næsta haust og stórgræði?

Eitt af því

sem mér fannst leiðinlegt við skiptin úr vindstigum yfir í m/s kvarðann var að þá fækkaði þeim skiptum þar sem maður heyrði vindstyrk lýst með mismunandi heitum. Oftast nær núorðið bara þetta og þetta margir metrar á sekúndu. Nú fyrir nokkrum dögum rakst ég á að Einar Sveinbjörnsson er búinn að setja saman lista á Veðurvefnum sínum þar sem hvert stig fær sitt heiti. Nappaði þessu þar:

MÁSEK-kvarðinn
m/sek Heiti
0 logn
1 andvari
2 Blær
3 kul
4 gola
5 súgur
6 gjóla
7 stinningsgola
8 kaldakorn
9 kaldi
10 næðingur
11 strekkingur
12 stinningskaldi
13 gustur
14 blástur
15 þræsingur
16 allhvasst
17 fjúkandi
18 hvassviðri
19 belgingur
20 hryssingur
21 stormur
22 beljandi
23 garri
24 illviðri
25 stóristormur
26 rok
27 hávaðarok
28 öskurok
29 garður
30 ofviðri
31 ofsaveður
32 stórviðri
33 aftök
34 mannskaðaveður
35 fárviðri

Nú verða örugglega einhverjir til að fetta fingur út í þennan lista t.d. með að 19 m/s ætti að vera hryssingur en ekki belgingur en ekki öfugt. Mér finnst þetta hins vegar frábært framtak hjá Einari. Þarna eru mörg góð veðurheiti sem væri synd að færu í glatkistuna.