Strč prst skrz krk

2012-09-5

Vegalengd

Filed under: Hjólreiðar,Vinnan — Jón Lárus @ 23:07

sem samsvarar lengd hringvegarins (1.332 km skv. Vegagerðinni) var lögð að baki í gærmorgun.  Þetta gerðist á svipuðum tíma ársins og undanfarin ár.  Til dæmis náði ég þessu 3.  sept. árið 2009 (þá var hringvegurinn hins vegar talinn 1.339 km). Helsta undantekningin var í fyrra þegar ég náði að klára þessa vegalengd í ágúst.

Auglýsingar

2010-12-17

Fríkað út í búðinni?

Filed under: Ýmislegt,Vinnan — Jón Lárus @ 22:50

Fékk jólapakka frá vinnunni núna í vikunni. Eins og undanfarin ár þá samanstóð pakkinn að mestu leyti af matvælum af ýmsu tagi; reyndar fjölbreyttari núna en oft áður. Ég var nátttúrlega á hjólinu, eins og oftast, og hafði því ekkert allt of mikið pláss í skjattanum. Ákvað því að taka heim í fyrstu lotu það sem þurfti á kælingu að halda. Henti því í pokann reyktum og gröfnum laxi, tveimur mismunandi hvítmygluostum, hreindýrakæfu, ítalskri pylsu og stórum pakka af soðinni en óskorinni skinku (held ég sé ekki að gleyma neinu). Hjólaði svo áfallalaust heim og henti öllu inn í ísskápinn. Svo kom Hildigunnur heim, ég mundi að sjálfsögðu ekkert eftir því að segja henni frá því að ég hefði fengið pakka frá vinnunni. Svo opnaði hún ísskápinn og sá hvert matgæðingsstykkið á fætur öðru og í nokkrar millisekúndur giska ég á að hún hafi hugsað: Ekki sleppa Jóni einum út í búð…

2010-04-23

Vorum fáliðuð

Filed under: Vinnan — Jón Lárus @ 23:57

í vinnunni í dag. Ekki nema þriðjungurinn af deildinni mættur. Öll hin í fríi. Að sjálfsögðu þá komu upp hin og þessi vandræði í nánast öllum kerfum sem ég kem eitthvað nálægt (og líka í kerfum sem ég kem ekkert nálægt en þurfti samt að redda). Takk Murphy…

2009-07-21

Kokkarnir í vinnunni

Filed under: Vinnan — Jón Lárus @ 00:34

voru greinilega að leika sér með samheitaorðabókina þegar þeir gerðu matseðill vikunnar.

Réttur dagsins (í gær): Sperðlar með uppstúf, kartöflum og grænum baunum (var raunar skrifað Sperlar…). Ungu strákarnir á deildinni skildu ekkert í þessu. Við heyrðum meðal annars: Vignir segir að þetta séu bjúgu. Heldurðu að það sé rétt?

Hvað ætli þeir hefðu sagt ef það hefði staðið grjúpán?

2009-05-13

Ljótur hálfviti

Filed under: Stríðni,Vinnan — Jón Lárus @ 23:45

Einhvern tímann um daginn þurfti ég að skjótast í vinnuna um helgi. Man ekki alveg hvað ég var að vesenast en Freyja kom með mér. Sinnti mínum erindum, tók svona 10-15 mínútur. Á leiðinni út langaði Freyju voðalega til að kíkja inn í æfingasalinn okkar. Ég lét það eftir henni. Þar var þá einn af meðlimum Ljótu hálfvitanna að lyfta, skeggprúður mjög. Á leiðinni niður stigann spurði hún hver þetta hefði verið með þetta mikla skegg. Ég sagði að þetta væri ljótur hálfviti. Hún varð svolítið hvumsa við og spurði eitthvað frekar um þetta. Ég mjólkaði þetta aðeins betur og kjálkinn á Freyju seig sífellt lengra niður, ekki vön að pabbi hennar talaði svona illa um fólk. Þegar ég sagði henni svo hvernig í málinu lægi fannst henni þetta bara pínulítið fyndið.

2008-10-31

Höfuðlaus her

Filed under: Vinnan — Jón Lárus @ 20:02

Við í deildinni vorum alveg á tauginni í dag.  Síðasti dagur mánaðar, efnahagsástandið og svo vorum við boðaðir á tvo fundi síðdegis.  Fyrst með deildarstjóranum og svo með fjármálastjóra fyrirtækisins.  Mættum á fyrri fundinn með deildarstjóranum með smá hnút í maganum.  Þá kom í ljós að honum hafði verið sagt upp.  Frekar óvænt.  Seinni fundurinn var síðan bara til að róa okkur.  Taugatrekkjandi.

2008-09-5

FLU

Filed under: Nördismi,Ruglið,Vinnan — Jón Lárus @ 22:00

Það kom eitt ansi gott símtal inn á þjónustuborðið okkar í dag. Við frammi í sal heyrðum allt í einu að strákarnir á þjónustuborðinu gjörsamlega sprungu úr hlátri. Skömmu síðar kom einn þeirra og útskýrði hvað hafði gerst. Þá hafði hann fengið símtal, sem hljóðaði einhvern veginn á þessa leið:

Starfsmaður: „Er þetta þjónustuborðið?“
Þjónustuborð: „Já, hvað er málið?“
S: „Internetið er ónýtt hjá mér!“
Þ: „?!“
Þ: „Hvað áttu við?“
S: „Ég get ekkert gert.“
Þ: „Bíddu, leyfðu mér að yfirtaka vélina þína.“
Þjónustuborð yfirtekur vélina og sér að vafrinn hefur verið stilltur á að þekja allan skjáinn og síðan ýtt á F11 þannig að stikurnar voru faldar.
Þ: „Þetta er ekkert mál, smelltu bara með músinni á gluggann og ýttu svo á F11.“
S: „Það virkar ekki!“
Þ: „Smelltu með músinni á gluggann og ýttu svo á F11.“
S: „Ég reyndi aftur og það gerist ekkert!“
Þjónustuborðið endurtekur fyrirmælin enn einu sinni og nú einstaklega hægt og skýrt.
S: „Ó, ég hélt þú ættir við að slá inn FLU“

Óborganlegt!

2008-07-2

Viðutan

Filed under: Brandarar,Vinnan — Jón Lárus @ 19:54

Nei, ekki ég, ekki að þessu sinni, heldur vinnufélagi minn einn. Vorum í mötuneytinu í gær. Þessi tiltekni vinnufélagi minn var búinn að borða og var á leiðinni að skila bakkanum af sér. Rakst þá á annan úr deildinni okkar og þurfti endilega að segja nokkur orð við hann. Hélt síðan áfram inn á deild með bakkann í hendinni. Kom skömmu síðar aftur til baka inn í mötuneyti, kafrjóður í framan, með bakkann. Þarf ekki að orðlengja að við grenjuðum öll af hlátri yfir þessu.

2008-03-7

Lærdómsvika

Filed under: Nám,Vinnan — Jón Lárus @ 19:49

Er svona hratt og hratt að kúpla mig út úr gömlu forritunum í vinnunni. Í staðinn er komin .net vinna og svo var ákveðið að ég myndi líka fara að læra á WebMethods hugbúnaðinn (samþættingarhugbúnaður). Það bar nú dálítið brátt að og núna í vikunni byrjaði ég að setja mig inn í þann heim.

Nú í lok vikunnar er hausinn alveg að springa af upplýsingum. Líður örugglega ekki á löngu þangað til fara að leka tvíundakerfisbitastraumar út um eyrun ef heldur svona áfram…

2007-12-19

-2 dagar

Filed under: Frí,Vinnan — Jón Lárus @ 23:57

í jólafrí. Þetta eru þvílík launamannajól núna þannig að ég ákvað að geyma smá af orlofinu mínu til að geta tekið almennilegt jólafrí. Hefur ekki gerst síðan ég byrjaði hjá Samskipum. Hafa alltaf verið einhverjar innleiðingar á tölvukerfum í gangi um áramót, sem hafa komið í veg fyrir það. Ekki núna samt. Hlakka til 11 daga samfellds jólafrís.

2007-11-13

990 km

Filed under: Hjólreiðar,Vinnan — Jón Lárus @ 21:56

Eftir daginn í dag er ég búinn að hjóla alls 990 km í vinnuna á þessu ári. Eða samtals 18 vikur. 1000 km múrinn ætti að falla í vikunni nema fari að frysta, sem lítur ekki út fyrir. Búinn að standa mig mun betur heldur en í fyrra. Þá náði ég 12 heilum vikum.

Tók svo hjólið í allsherjar klössun um helgina, smurði það allt og bætti vindi í dekkin. Munar ótrúlega miklu. Þetta er eins og nýtt hjól á eftir. Líka furðulega mikill munur á ferðinni sem ég náði í dag úr og í vinnu. Munar sennilega 2-3 mínútum á ekki lengri leið.

Það hefur greinilega verið farinn að minnka þrýstingur í dekkjunum án þess að ég tæki eftir því. Ég skildi líka ekkert orðið í því hvað ég komst lítið áfram þó ég puðaði og puðaði. Hélt bara að þetta væri aldurinn.

2007-09-13

Headhunting

Filed under: Vinnan — Jón Lárus @ 20:43

Það var haft samband við mig frá ónefndu fyrirtæki hér í bæ í síðustu viku og mér boðin vinna. Reyndar hefur verið haft samband við mig þrisvar sinnum á innan við ári og mér boðin vinna. Fyrri tveimur tilboðunum hafnaði ég. En þetta kitlaði svolítið þannig að ég fór og kíkti á aðstæður.

Fékk líka tilboð frá núverandi vinnuveitanda eftir að ég sagðist vera að skoða atvinnutilboð. Er síðan búinn að vera að vega og meta hlutina. Tók síðan þá ákvörðun í gær að vera um kyrrt. Líst bara betur á hlutina þar sem ég er.

Get samt ekki neitað því að það er gott fyrir egóið að verða fyrir hausaveiðurum.

2007-06-11

Hasar

Filed under: Vinnan — Jón Lárus @ 23:00

í vinnunni á fimmtudaginn. Þá ætlaði ég að fara á salernið einhvern tímann síðdegis. Maður þarf að fara í gegn um búningsklefa til að komast þangað. Þegar ég ætlaði þar inn var ég rekinn öfugur út aftur. Allt fullt af löggum og fíkniefnahundur á svæðinu.

Daginn eftir þegar ég var að fara úr vinnunni var síðan ómerktur sendiferðabíll fyrir utan. Tvær löggur við hann að baksa við að ná hundi út.

Veit síðan ekkert hvað kom út úr þessu tilstandi öllu saman.

2007-06-2

Neonbleikir

Filed under: Vinnan — Jón Lárus @ 01:04

bolir á línuna í vinnunni í dag. Var svolítið fyndið að sjá suma samstarfsmennina, sem gátu ekki hugsað sér að vera í 19 júní bleikum bolum. Það er að segja fyrr en allir aðrir voru komnir í svona boli. Voru orðnir að athlægi þeir sem ekki þorðu.
Fjölskyldan

Litasýnishorn hér…

2007-05-23

Loksins

Filed under: Hjólreiðar,Vinnan — Jón Lárus @ 18:37

Tók eftir því í gær þegar ég ók Sæbrautina að búið var að malbika þann bút af hjólastígnum sem eftir var meðfram nýja hluta hennar. Það var nú ekki seinna vænna. Framkvæmdum við akbrautina lokið fyrir mörgum mánuðum en eins og venjulega eru hjóla og gönguleiðir látnar sitja á hakanum.

Ég er búinn að hlakka til þess að þetta væri klárað í marga mánuði og hjólaði þess vegna meðfram Sæbrautinni í vinnuna í morgun. Algjör snilld. Held ég sé 2-3 mínútum fljótari en að fara gömlu leiðina, jafnvel þó þessi sé 3-400 m lengri. Munar um það hvað eru fá ljós á leiðinni. Eini gallinn er að maður er berskjaldaður fyrir vindi eins og ég fékk að reyna á heimleiðinni.

2007-05-11

Úti á þekju

Filed under: Ruglið,Vinnan — Jón Lárus @ 20:17

Ég var þokkalega úti á þekju í vinnunni áðan. Þegar var að koma að hættutíma (að ég hélt) þá fór ég að tygja mig til heimferðar. Hugsaði svo sem ekkert út í að það væri lítið fararsnið á félögum mínum. Þeir voru hvort eð er flestir að fara í einhverja óvissuferð (með kántríþema (bleah!). Ókeypis bjór er ekki nóg til að draga mig á svoleiðis nokkuð).

Allavega, ég dreif mig af stað. Hjólaði heim. Þegar þangað var komið skildi ég ekkert í því að Hildigunnur væri ekki heima. Skipti um föt, kom upp og varð litið á klukkuna. 16:11! Bíddu, bíddu, klukkan orðin snarvitlaus. Kíkti á klukkuna í eldhúsinu. Líka 16:11. Hafði hætt klukkutíma of snemma í vinnunni.

2007-05-2

1. bekkingar

Filed under: Fjölskyldan,Vinnan — Jón Lárus @ 23:02

fengu gefins reiðhjólahjálma í dag. Það er ekki nema gott eitt um það að segja, nema að hjálmurinn er kyrfilega merktur Eimskipum. Það er ekki glæta að Finnur fái að fara út að hjóla með Eimskipaauglýsingu á hausnum.

Eins gott

Filed under: Fjölskyldan,Vinnan — Jón Lárus @ 22:45

að það eru ekki allir dagar eins og dagurinn í dag.

Mættur í vinnuna um hálf níu. Þetta var svona að mestu leyti venjulegur dagur í vinnunni (miðað við það að við erum að taka í notkun nýtt flutningakerfi) til klukkan hálf tvö. Þá þurfti ég að sækja bæði Freyju og Finn og fara með þau til hne læknis. Allt í góðu lagi með eyrun á báðum börnunum, sem betur fer.

Kippti þeim báðum með í vinnuna eftir það og leyfði þeim að vera í krakkaherberginu. Síðan var hóptími hjá Finni kl. hálf fimm í tæpan klukkutíma. Vorum komin heim rétt fyrir sex. Þá þurfti að taka til mat. Eins gott að það voru til afgangar frá afmælinu.

Þurfti svo að sækja Hildigunni út í Hafnarfjörð kl. hálf átta. Hún skutlaði mér svo aftur í vinnuna. Rétt fyrir tíu var ég alveg hættur að geta hugsað nokkuð af viti og náði strætó heim.

2006-11-29

Helgin

Filed under: Fjölskyldan,Frí,Vinnan — Jón Lárus @ 23:02

Maður sér nú bara sína sæng upp reidda! Sé næstu vinnuviku í hillingum (næstum). Miðað við þetta

2006-11-7

Þessa dagana finnst mér alltaf eins og það sé komi…

Filed under: Nám,Vinnan — Jón Lárus @ 21:56

Þessa dagana finnst mér alltaf eins og það sé komin helgi þegar ég er búinn í skólanum á miðvikudögum. Á mánudögum og miðvikudögum er skólinn til hálfellefu og á þriðjudögum er fótboltinn. Alveg búinn þegar ég kem heim á þessum dögum.

Eftirfarandi síða »

Stofnaðu ókeypis vef eða blogg á WordPress.com.