Strč prst skrz krk

2010-02-11

Hraðskreið

Filed under: Formúla 1 — Jón Lárus @ 20:47

sláttuvél, eða hvað?

Auglýsingar

2009-07-12

Ég kom inn í

Filed under: Fjölskyldan,Formúla 1 — Jón Lárus @ 11:45

borðstofuna áðan. Var að hugsa um formúluna og sagði við Fífu: „Ég vona að það verði rigning á eftir“, án frekari skýringa. Fífa varð náttúrlega eitt spurningamerki í framan. Þá áttaði ég mig á að það vantaði kannski aðeins meiri útskýringar við þessa ósk. Og bætti við já þú veist úti í Þýskalandi þarna á eftir.

2009-04-5

Spurning hvort að

Filed under: Formúla 1 — Jón Lárus @ 20:38

Bernie Ecclestone, sá sem ræður í raun öllu í Formúlu 1 keppninni, sé íslenskur útrásarvíkingur í a.m.k. aðra ættina. Gróðahyggjan er svo alger að ekkert annað kemst að. Engin virðing er borin fyrir sögunni og arfleifðinni. Brautum, sem keppt hefur verið í yfir 50 ár, er hent út af keppnislistanum án þess að blikka auga. Nýjasta snilldin hjá honum var að Ástralíukappaksturinn og Malasíukappaksturinn voru færðir til þannig að keppt væri síðar á deginum. Allt til að Evrópubúar gætu sofið aðeins lengur frameftir. Gekk svo sem allt í lagi í Ástralíu. Hins vegar gleymdu menn að taka í reikninginn (eða horfðu framhjá) að í Malasíu þá rignir alltaf á þessum tíma dags á þessum árstíma. Afleiðingin varð náttúrlega sú að ekki var hægt að ljúka kappakstrinum því brautin breyttist í fljót. Og hver ætli hafi nú staðið fyrir því að dreifa keppnum um allar trissur þótt lítið sé fylgst með F1 annars staðar en í Evrópu? Jú, Bernie Ecclestone.

2009-03-29

Formúlan

Filed under: Formúla 1 — Jón Lárus @ 12:49

byrjaði með stæl í morgun með Ástralíukappakstrinum. Ég var nú ekki með neinar væntingar til minna manna, því þeim hafði gengið herfilega á æfingum fyrir keppnina. Þó fór svo að Hamilton náði að komast upp í þriðja sæti úr því átjánda, sem hann lagði af stað úr. Þar hjálpaði nú til að allmargir keppendur féllu úr leik. Ýmist vegna bilana eða þá að þeir ákváðu að nota self destruct takkann í stýrinu hjá sér.

Annars held ég að reglugerðarbreytingarnar, sem gerðar voru fyrir tímabilið séu af hinu góða. Í meginatriðum gengu þær út á að minnka loftaflsgrip bílanna en auka mekanískt grip. Lítur út fyrir að ökumenn geti fylgt andstæðingnum betur eftir með þessu móti. Brautin í Melbourne hefur nú ekki verið þekkt fyrir mikinn framúrakstur en í morgun var annað uppi á teningnum. Hörkuskemmtileg keppni og það á braut, sem að mínum dómi er ein sú alleiðinlegasta.

Verður svo spennandi að sjá hvernig þetta kemur út á brautum þar sem þó var hægt að taka fram úr áður.

2008-11-23

Ái

Filed under: Íslenska,Þríþraut,Formúla 1,Ruglið — Jón Lárus @ 01:07

Mbl.is þarf varla á prófarkalesurum að halda meðan þeir eru með skrifara á borð við þennan, eða hvað?

„Webber slasaðist er hann varð fyrir bíl í fjölþrautarkeppni í Tasmaníu í dag, en sjálfur reið hann torfæruhjóli. Brotnaði bein í hægri löpp og gekkst hann undir aðgerð vegna þess í dag. Komið var stálpinna fyrir í löppinni til að styðja við beinið meðan það gróir saman.“

Það þarf einbeittan brotavilja til að hnoða svona ósköpum saman.

Ósköpin eru ekki búin:

„Hann var fluttur með þyrlu á sjúkrahús og fyrstu fregnir af slysinu voru á þá lund að hann hefði slasast alvarlega og hlotið beinbrot hér og þar um líkanna.

Síðar kom í ljós, að einungis brotnaði eitt bein í hægri löpp. „Mark er hress og að beinbrotinu frátöldu er hann vel á sig kominn.““

Hvar ætli mbl.is hafi fundið þennan snilling?

2008-11-2

Filed under: Formúla 1 — Jón Lárus @ 23:56

Þvílík spenna í síðasta 2008 formúlu 1 kappakstrinum í dag. Staðan var þannig að minn maður, Lewis Hamilton þurfti að enda í 5. sæti eða hærra til að tryggja sér titilinn. Sá eini, sem átti möguleika á titlinumu fyrir utan hann, Massa var fremstur á ráslínu. Rétt áður en átti að ræsa keppnina skall á hellidemba þannig að þurfti að skipta um dekk á öllum bílunum. Þegar loksins var hægt að hefja kappaksturinn þá gekk allt (eða næstum því allt) að óskum. Rigningin stóð stutt og þegar brautin tók að þorna var Hamilton 4.-5. sæti. Svo þegar svona 5 hringir voru eftir þá byrjaði að rigna aftur. Allir keppendur flykktust inn á viðgerðasvæði til að skipta um dekk nema Glock, annar Toyota ökumaðurinn. Þetta þýddi að Hamilton var orðinn 5. og svo skömmu síðar þegar hann missti Vettel fram úr sér 6. sem hefði þýtt að Massa hefði orðið meistari. Sem betur fer náði Hamilton að skreiðast fram úr Glock í næstsíðustu beygju. Niðurstaðan: Hamilton meistari, einu stigi á undan Massa. Þetta var ekki glæsilegt en verðskuldað samt. Veit ekki til þess að Það hafi staðið svona glöggt nokkurn tímann áður í næstum 60 ára sögu F1.

2008-09-7

Dómaraskandall

Filed under: Formúla 1 — Jón Lárus @ 20:00

Á ekki orð til að lýsa úrslitum Spa kappakstursins, sem fram fór í dag. Hamilton vann eftir frábæran akstur. Því miður féll Raikkönen út á næstsíðasta hring, hefði svo sem alveg átt skilið að vinna því hann hafði forystuna nánast alla keppnina.

Þegar 3 hringir voru eftir fór að rigna. Hamilton, sem hafði fylgt Kimi eins og skugginn var miklu fljótari en hann í bleytunni og reyndi framúrakstur, sem gekk ekki upp. Kimi gaf ekkert pláss þótt Hamilton væri kominn með framhjólin framúr. Hamilton neyddist þá til að gefa eftir og skera næstu beygju og var þá kominn fram úr Kimi. Þar sem Hamilton græddi á því varð hann að gefa sætið aftur til baka, sem hann gerði. Hélt sig svo rétt á eftir Kimi og tók framúrakstur í næstu beygju. Þar ók Kimi svo aftan á Hamilton og skemmdi framvæng við það. Næsta hring var Kimi svo á hælunum á Hamilton þar til þeir komu að stað þar sem bíll hafði farið útaf og gulum flöggum var veifað. Hamilton hægði á sér en Kimi ekki og náði forystunni aftur (framúrakstur er bannaður undir gulum flöggum en því misstu þessir amatördómarar af). Nokkrum beygjum síðar missti Kimi stjórn á bílnum, ók á vegg og féll úr leik. Hamilton náði síðan að klára síðasta hringinn án vandræða.

Eftir keppnina tilkynntu dómarar keppninnar að atvik milli Kimi og Hamilton yrði skoðað. Niðurstaðan varð síðan sú að Hamilton var refsað með því að bæta 25 sek. við tímann, sem þýddi að hann féll úr fyrsta sæti niður í það þriðja. Afleiðingin er sú að Massa (annar í heildarkeppninni) erfir fyrsta sætið án þess að hafa sýnt nokkurn skapaðan hlut í kappakstrinum.

Nú kynnu einhverjir að segja að hafi Hamilton gert eitthvað af sér þá eigi að refsa honum. Að sjálfsögðu er það þannig. Hins vegar gerði hann allt rétt, gaf eftir sæti þegar hann vann það á ólögmætan hátt. Hins vegar er ekkert, sem segir að hann megi ekki taka fram úr aftur. Svona atvik hafa komið margoft upp og ég hef aldrei á þeim 11 árum, sem ég hef fylgst með formúlu 1 séð refsað fyrir svona lagað. Til dæmis í Kanadakappakstrinum þá notaði Vettel sér þetta þrisvar a.m.k. til að halda Kovalainen á eftir sér. Engin refsing þar. Þar hefði þó einmitt átt að beita refsingu því keppandi græddi á að skera beygju en gaf sætið ekki eftir. Man samt eftir einu eða tveimur tilvikum þar sem var beitt refsingu en þá hafði ökumaðurinn, sem vann sæti með því að skera beygju ekki gefið sætið eftir aftur.
Annað furðulegt atvik átti sér líka stað. Þar var hinn McLaren ökumaðurinn, Kovalainen í aðalhlutverki. Hann var að reyna framúrakstur, sem misheppnaðist og endaði á því að bíllinn hjá þeim sem hann reyndi að taka framúr snerist. Kovalainen fékk refsingu fyrir þetta. Sanngjarnt að öllu öðru leyti en að svona lagað hefur komið fyrir í nánast öllum keppnum á þessu tímabili. Þarna var samt ökumanni refsað í fyrsta skipti fyrir svona atvik. Samkvæmni í dómum afskaplega lítil.

Hér að neðan má sjá þetta atvik á myndbandi:

Í lokin er hér svo vísun í grein, sem lýsir þessu afar vel. Skoðaði svo ítölsku pressuna og meira að segja þar er talað um durissimo (afar strangt) í sambandi við þessa dómgæslu.

Maður fer að hallast að því að formúla 1 sé keppni þar sem 20 bílar keppa og að lokum vinni Ferrari.

2008-08-3

Loksins

Filed under: Formúla 1 — Jón Lárus @ 23:53

var McLaren heppið (eða tiltölulega heppið). Ég veit ekki hversu oft síðan 1997 þegar ég byrjaði að fylgjast með Formúlunni að vélin hefur bilað í McLaren bíl, sem var með forystu og Ferrari hefur endað á því að vinna. Í dag snerust hlutirnir við. Kominn tími til.

Fyrir utan það að Kovalainen átti alveg skilið að vinna sinn fyrsta sigur. Ekki búinn að vera smá óheppinn í mótinu fram að þessu.

2008-05-11

Tyrkneski

Filed under: Formúla 1 — Jón Lárus @ 23:38

kappaksturinn í morgun var mjög skemmtilegur. Og það þrátt fyrir að mínir menn ynnu ekki og Kovalainen lenti í tómu basli. Þarna var alvöru kappakstur, með fullt af framúrökstrum og ökumenn á misjöfnum keppnisáætlunum sem gerði það að verkum að úrslitin voru ekki ráðin fyrr en alveg í lokin. Loksins sýndi svo Hamilton almennilegan akstur. Hann hefur ekki alveg náð að sýna sitt besta á þessu tímabili nema kannski í fyrsta kappakstrinum í Ástralíu. Kovalainen á svo inni að það fari að ganga vel hjá honum. Tveir kappakstrar í röð, sem hafa farið í súginn án þess að hann hafi átt sök á því.

Himinn og haf frá síðasta kappakstri í Barcelona. Ég bíð svo spenntur eftir Mónakókappakstrinum. Verður fróðlegt að sjá ökumenn takast á við þau öngstræti án gripstýringar. Gætu orðið talsverð afföll í þeim kappakstri.

2008-04-5

Flott hjá

Filed under: Formúla 1 — Jón Lárus @ 20:24

Kubica að ná ráspól í Bahrein í morgun. Fyrsta skipti, sem hann nær þeim árangri og það er alveg verðskuldað. Líka gaman að sjá ný andlit í miðjunni á blaðamannafundinum eftir tímatökurnar. Voru víst 22 keppnir þar sem bara ökumenn Ferrari eða McLaren höfðu náð besta tíma í tímatökum. Þó ég sé McLaren maður og hafi verið síðan ég var 7 eða 8 ára þá er bara fínt að önnur lið blandi sér í baráttuna. Einstefna er alltaf leiðinleg. Svo er bara að fylgja þessu eftir og vinna á morgun.

2007-09-13

Grrr

Filed under: Formúla 1 — Jón Lárus @ 21:08

Mínir menn aldeilis teknir í bakaríið af FIA vegna njósnamálsins svokallaða. Í stuttu máli snýst málið um það að starfsmaður Ferrari lét starfsmann McLaren hafa tæknileg skjöl í talsverðu magni. Það er óumdeilt. Hins vegar er erfiðara að segja til um hvort að einhver annar innan liðsins hafi vitað af skjölunum eða þá að þau hafi verið notuð (það er raunar frekar ótrúlegt, því þegar upplýsingunum var lekið þá var löngu búið að hanna bílinn).

FIA menn telja sig greinilega hafa sannað að McLaren hafi nýtt sér þessar upplýsingar og láta sleggjuna falla. Búið að gefa upp hver refsingin á að vera (McLaren missir öll stig í keppni bílasmiða á þessu ári + 100 milljón $ sekt og síðan er einhver óútfylltur víxill á næsta ári ef þeir hegða sér ekki vel). Væntanlega getur McLaren áfrýjað en hvort það er til einhvers er annað mál.

Mér finnst megn skítalykt af þessu máli. Spurning hvort FIA er að nota aðstöðuna til að refsa McLaren fyrir að hafa reynt ásamt fleiri liðum að stofna aðra kappaksturskeppni um árið. Þeir sem hafa áhuga geta kíkt á þennan hlekk, þar sem velt er upp nokkrum spurningum, sem forvitnilegt væri að fá svör við.

2007-06-17

Flott

Filed under: Íþróttir,Formúla 1 — Jón Lárus @ 22:23

íþróttahelgi núna. Fyrst vann kvennalandsliðið okkar lið Frakka í knattspyrnu. Glæsilegur sigur. Frakkar eiga eitt af bestu kvennalandsliðum heims. Nær væri fyrir KSÍ að leggja meiri áherslu á kvennaliðið heldur en að púkka upp á þetta handónýta karlalandslið.

Síðan voru úrslitin í Bandaríkjakappakstrinum fín. McLaren greinilega komið með góðan bíl og unnu öruggan sigur. Það sást meira að segja alvöru kappakstur á köflum (Fisichella kom á óvart með mjög ákveðnum akstri), sem hefur verið af skornum skammti á þessu tímabili fyrr en í síðustu tveimur keppnum.
Ég var dauðhræddur fyrir Kanadakappaksturinn og þennan um að Ferrarimenn yrðu erfiðir viðureignar. Annað kom heldur betur á daginn. Næsta keppni, Frakklandskappaksturinn, ætti síðan að henta McLaren vel. Þar er fullt af hægum beygjum, sem virðist vera Akkilesarhæll á Ferraribílnum í ár.

Að lokum vann svo handboltalandsliðið okkar einvígi við Serba um að komast í úrslitakeppni næsta Evrópumóts með einu marki. Hefðum við skorað einu marki færra hefðu Serbarnir farið áfram.
Þetta hefur greinilega verið háspennuleikur. Ég var hins vegar að stússa ýmislegt, gera jógúrt og rúgbrauð og gleymdi leiknum alveg.

2007-06-11

Kanadakappaksturinn

Filed under: Formúla 1,Hneykslun — Jón Lárus @ 22:51

Það eru keppnir eins og þessi í gær, sem gera það að verkum að ég fylgist með formúlunni. Þvílík dramatík. Í þessari einu keppni gerðist meira heldur en í öllum keppnum ársins fram að þessu. Ekki spillti svo fyrir að mínum mönnum (McLaren) gekk vel á meðan erkifjendurnir áttu dapran dag.

Get svo ekki annað en kvartað yfir umfjölluninni hjá sjónvarpinu. Það er einfaldlega ekki nógu gott að þeir sem eru að lýsa keppninni missi af 2 augljósum atriðum. Annars vegar þegar Massa var skyndilega kominn fram úr Alonso. Tók þá að minnsta kosti hálfan hring að uppgötva það. Hitt atriðið var þegar Alonso og annar keppandi fengu 10 sekúndna refsingu, sem þurfti að taka út á viðgerðasvæðinu. Skilaboð um það komu fram á skjánum en lýsendur tóku ekki eftir því fyrr en þeir tóku út sína refsingu löngu síðar.

Ég veit vel að það er ekkert grín að vera með beina lýsingu og alveg hægt að fyrirgefa einhverjar smáyfirsjónir og mismæli en þetta gerist í nánast hverri einustu keppni að þeir missi af einhverju svona (nema kannski í Barcelona og Mónakó en í þeim kappökstrum gerðist hvort sem er ekki neitt).

2007-05-29

Ein

Filed under: Formúla 1 — Jón Lárus @ 23:37

leiðinlegasta keppni ársins í formúlunni, Mónakó, að baki nú um helgina. Gerðist bókstaflega ekki neitt. Önnur keppnin í röð, sem ekkert gerist (eins gott að Imola er ekki með núna annars hefðu það verið 3 keppnir í röð). Eina sem var gott voru úrslitin. Þau voru mjög fín.

Venjulega getur maður búist við því að allt að helmingur keppenda heltist úr lestinni. Ekki núna. Duttu bara 3 eða 4 út. Þyrfti helst að vökva brautina ef það er þurrkur til að fá einhverja spennu í þetta.

Nú fara hins vegar að koma skemmtilegri brautir þannig að vonandi hleypur meiri spenna í þetta.

2007-03-19

Meiri formúla

Filed under: Formúla 1 — Jón Lárus @ 00:31

Ég er enn að slappast í formúluglápinu.  Nennti ekki að vakna til að horfa.  Var síðan mjög feginn þegar ég horfði á endursýninguna.  Eins og langoftast var Ástralíukappaksturinn óspennandi.  Mér leiðast þessar brautir þar sem er ekki/mjög erfitt að taka fram úr.  Nóg að hafa eina slíka; Mónakó.  Annars var ég sáttur við mína menn.  Annað og þriðja sæti ekki slæmur árangur, a.m.k. virðist bíllinn skárri heldur en í fyrra.

Annars var fyndið að lesa umfjöllunina í ítölsku og bresku pressunni.  Ítalirnir töluðu ekki um annað en Raikkönen en Englendingarnir bara um Hamilton.  Sínum augum lítur hver silfrið.

2007-03-17

Formúlan

Filed under: Formúla 1 — Jón Lárus @ 13:56

er byrjuð.  Eina sportið, sem ég fylgist með.  Ég er samt aðeins farinn að slappast í þessu.  Horfði ekki á tímatökuna í nótt, lét nægja að fylgjast með endursýningunni.  Mjög sjaldan, sem það gerist.  Öðruvísi mér áður brá.

2006-10-23

Gleymska

Filed under: Blogg,Formúla 1 — Jón Lárus @ 23:41

Mér er nú ekki við bjargandi. Gleymdi síðasta bloggdegi. Mundi ekki eftir því fyrr en daginn eftir.

Annars tók ég því frekar rólega í gær. Þó að ástandið eftir árshátíðina hefði verið ótrúlega gott (náði meira að segja að fara í aukatíma í C# námskeiðinu kl. 10 (ok, ok ég mætti reyndar ekki fyrr en 10:30)) þá var nú samt mjög gott að leggjast upp í sófa og horfa á formúluna.

2006-07-4

Formúlan

Filed under: Formúla 1 — Jón Lárus @ 00:01

Þetta er bara að breytast í eitthvað íþróttablogg hjá mér.
Formúlukeppnin í gær var alveg örugglega sú leiðinlegasta á árinu. Hjálpaði náttúrlega ekki að McLaren náði ekki að keyra einn einasta hring. Schumi vann öruggan sigur. Ég held nú að þetta hafi lítið forspárgildi fyrir framhaldið. Hef nefnilega á tilfinningunni að Michelin hafi mætt með mjög örugg en um leið hæg dekk út af skandalnum í fyrra. Segir nú sitt að Toyota sé að berjast um pallsæti…

2006-06-11

Formúlan

Filed under: Formúla 1 — Jón Lárus @ 23:48

Ekkert sérstaklega skemmtileg keppni í morgun. Þó eru batamerki á mínum mönnum. Kimi varð 3. eftir að hafa verið í öðru sæti meirihluta keppninnar. Himinn og haf frá Barcelona þar sem hann varð 5. og átti aldrei möguleika á neinu meira. Bara vonandi að þeir haldi áfram á þessari braut.

2006-04-23

Málblóm

Filed under: Íslenska,Formúla 1 — Jón Lárus @ 23:04

Eftirfarandi heyrðist í formúluútsendingu í morgun í sjónvarpi allra landsmanna:
Brautin er ekin í öfugan klukkugang! Líklega var verið að reyna að þýða counterclockwise, með þessum hörmulegu afleiðingum.
Síðan:
Hann ekur hratt, svona tímalega séð!

Ok, ég veit að þetta er bein útsending en þetta er bara ekki nógu gott. Fyrir utan að umsjónarmennirnir missa trekk í trekk af augljósum atriðum. Gerist í hverri einustu keppni. Eitthvað gerist í brautinni og tekur óratíma þar til gaurarnir, sem eiga að segja okkur hvað er að gerast átta sig á því. Tók þá til dæmis um mínútu að taka eftir einu ákveðnu atriði í morgun.

Þetta ætti ekki að vera flókið. Þeir eru tveir og með nettengda tölvu fyrir framan sig. Með því að skipta með sér verkum þ.a. annar fylgist bara með tímunum (ótrúlega mikið, sem hægt er að sjá bara með því) og hinn bara með myndinni þá ættu þeir að ná að dekka þetta.

Þar að auki finnst mér að ætti að leggja þessari Imolabraut (Karþagó lögð í eyði hvað?).

Eftirfarandi síða »

Bloggaðu hjá WordPress.com.